O presidente da Xunta, Emilio Pérez Touriño, salientou esta tarde o “adecuado e preciso” nivel de “coordinación” entre os Gobernos central e autonómico co que se desenvolveu todo o proceso para solucionar a situación xerada pola descomposición de parte da carga transportada polo buque holandés Ostedijk, así como o “elevado grao de transparencia” na información sobre os feitos, que fixo posible o traslado “de xeito recorrente e sistemático” da mesma á cidadanía. Así o expresou o máximo mandatario autonómico esta tarde na Torre de Control de Salvamento Marítimo da Coruña, onde mantivo unha reunión coa ministra de Fomento, Magdalena Álvarez, para analizar a situación na que se atopan os traballos para solucionar o proceso de descomposición de parte dos fertilizantes transportados polo Ostedijk.

Tras dela, a ministra informou de que o proceso de descomposición está detido nun porcentaxe superior ao 95% polo que se dá practicamente por concluído o proceso de enfriamento da carga. Na rolda de prensa conxunta de ambos os dous mandatarios, Emilio Pérez Touriño avaliou como “moi positiva” esta información, dado que supón que o incidente provocado polo buque holandés está practicamente concluído. O xefe do Executivo sostivo que “sen dúbida” a xestión de todo o proceso foi realizada “cun nivel adecuado e preciso de coordinación” entre as dúas administracións. “Un nivel adecuado e preciso do traballo realizado, no que a administración autonómica o fixo a través do seu propio sistema, coordinado o seu traballo polo conselleiro da Presidencia e a participación das consellerías previstas de Medio Ambiente, de Pesca e de Política Territorial”, puntualizou. Xunto á coordinación o presidente salientou a transparencia informativa practicada en todo momento. “Este incidente caracterizouse polo elevado grao de transparencia. Información sen reservas, detallada, concisa, clara e nítida. Non nos reservamos nin gardamos nada. Cónstame que se trasladou de xeito recorrente e sistemático toda a información á cidadanía desde a responsabilidade da xestión do operativo de crise”, remarcou. Paralelamente, salientou que todas as decisións adoptadas polo equipo xestor da incidencia estiveron “baseadas e amparadas” por criterios técnicos, “cos expertos necesarios para cada caso e cada decisión”. “A posición do barco estivo en todo momento determinada polos elementos técnicos que a autoridade marítima en cada momento estimou necesarios: augas tranquilas e ventos favorables. E en función destes criterios técnicos o barco estivo onde tivo que estar, exactamente onde entendemos que tiña que estar”, subliñou. Na súa intervención, o presidente quixo facer un recoñecemento “ao traballo, á profesionalidade e á eficacia” de todos e cada un dos operativos que participaron no proceso de xestión e solución deste incidente, pois segundo expresou “cumpriron cunha grande eficacia, unha grande entrega e cunha grande profesionalidade”. “A miña felicitación a todos e cada un dos que achegaron o seu traballo e o seu saber”, sinalou. Finalmente, puxo en valor o feito de que a xestión de todo o proceso vivido nos últimos días foi posible rematala con eficacia grazas a que hoxe Galicia conta con máis medios e con máis recursos para protexer e salvagardar a seguridade marítima.